|
|
2002-12-08 - 10:49 p.m. 呢件咩o黎o家? 今日, 家姐忽發奇想: 執衫! 呢件事係想做好耐, 知道要做, 但又冇人敢做o既o野! 實在唔明佢發咩神經! 我只係話: 你執囉...主要工作都係..掉你o的衫之嘛...我負責掉又點話! ..我淨係負責掉! 我仲建議執之前食翻o的o野先有氣有力, 家姐又唔信! 咪就係後悔之嘛... o向呢四個鐘o既執衫過程裡面, 真係笑料百出! 我地都不停咁大笑! 真係好搞笑! 以下係几件: - 几乎每攞一件衫出o黎, 家姐都問: 呢件咩o黎o家? 邊個買o家! 起初我都好認真咁答, 但後來發覺佢根本唔在乎答案, 佢只係有o的驚嘆有o的衫係佢未見過o家喎佢話... - 我做o左個小小非正式調查, 我地總共有18條牛仔褲, 11條牛仔裙, 52件T-shirts, 13件黑色吊帶背心, 14件裇衫, 8件黑色絲襪衫, 就連內衣褲都以打計 .....點解係非正式, 都係因為我數數下都費事再數! - 家姐攞住條紫色短褲, 諗住好大聲咁踐踏我o既品味, 但說時遲, 那時快, 我已手執一條勁高叉o既迷你裙! 問你死未? - 有好多衫都唔捨得掉但又唔會再著出街,咁我地就會講: 今晚訓覺著囉! 我突然問o左佢一句: 今晚著咁多衫! 會唔會好熱o家~ - 執出o黎掉o既衫足足有兩個櫃咁多! 咁我又問家姐: 點解一個櫃可以載三個櫃o既衫? 佢係咪有得伸縮o架? - 有好多衫都好靚o家如果我地瘦o的! 我地都決定將呢堆要好瘦先著得靚o既衫擺埋一邊, 有待他朝一日再著! 不過, 就係呢一刻, 我發覺家姐正在掉緊一堆上年比我地擺埋o左一邊, 又係要好瘦先著得靚o既衫! 此時此刻, 我地都萬分無奈~ - 每年執衫, 總係掉好多好多新衫出o黎! 阿媽總係拎住條著到爛o既衫話: 呢件未著過就掉! 又或者攞住條我地都未著過o既褲話: 呢件你地好中意o家喎! 咁捨得掉? ********** 就係咁, 我過o左一個好快樂o既一日! 今晚無綫冇咩好節目, 我地都話悶, 跟住我有個建議: 頭先我地執衫咪好開心o既, 不如我地執埋個袋櫃同鞋櫃o丫? 不如以後唔開心就執o野o丫?
|